Mensahe ng Pagtatapos mula kay Regional Director Gilbert T. Sadsad

Malugod na pagbati sa ating mga minanamahal na magsisipagtapos, kagalang-galang na mga panauhin, itinatanging mga guro, at sa labis nating ipinagmamalaking mga magulang!

Buong kasiyahan at karangalang ang aking pagbati sa inyong Araw ng Pagtatapos sa Taong Panuruan 2024-2025.  Isang makasaysayang okasyon ang araw na ito sapagkat mahigit na apat na raang libo (400,000) mag-aaral  sa Rehiyon V (Bicol) ang matagumpay na nakapagtapos sa elementarya, senior high school, at Alternative Learning System. Ngayon ang tanda ng pagdiriwang ng inyong pagsusumikap, katatagan, at dedikasyon sa buong lakbayin ng inyong akademikong buhay.

Ang tema ng pagtatapos ngayong taon, “Henerasyon ng Pagkakaisa: Kaagapay sa Bagong Pilipinas,” ay pahiwatig ng malalim na kahulugan sa diwa ng ganitong pagtitipon at ang mga hangarin na nais nating matamo. Kaya naman sa mahalagang sandaling ito, habang kayo ay nahaharap sa panibagong simula ng inyong lakbayin, hinihikayat ko kayong isabuhay ang diwa ng pagkakaisa at higit na paalabin ito sa inyong mga puso.

Naharap kayo sa maraming hamon sa pag-aaral, gayunpaman ay nagpatuloy kayo, nagpakita ng tapang, at matibay na pananalig sa edukasyon. Sa inyong pagtatapos ngayon, hindi lamang ito hakbang sa tungo sa inyong pansariling kinabukasan; bagkus ito ay isang sama-samang tinipong lakbayin na lubhang kinakailangang sa pag-unlad at pagbabago ng ating bansang Pilipinas.

Ang pagkakaisa ay hindi lamang isang konsepto; ito ay isang panawagan bilang mga mamamayan nitong magiting na bansang Pilipinas.  Sa Bicol, na kilalang may malasakit sa kapuwa, katatagan, at mayamang kultura, isanasabuhay natin ang espiritu ng pagtutulungan upang solusyunan ang mga suliranin, itinataguyod ang mga nasa laylayan, at lumilikha ng isang inklusibong kapaligiran para sa lahat. Sa inyong patuloy na  paglalakbay, maging ito man ay sa kolehiyo o mas mataas pang pag-aaral, sa larangan ng trabaho, o maging sa paglilingkod sa komunidad, hayaan na ang inyong mga kilos at gawi ay gabayan ng mga prinsipyo ng pagtutulungan, pagpapahalaga, at sama-samang pag-unlad.

Tandaan, bawat isa sa inyo ay may natatanging talento, kakayahan at pananaw na makatutulong sa ating bayan. Yakapin ang inyong mga pagkakaiba-iba, makipagtulungan, at aktibong makilahok sa mga talakayan na magpapabuti sa ating mga komunidad. Maging henerasyon kayo na hindi lamang nangangarap ng mas magandang kinabukasan kundi kaisa at kasama sa paglikha nito.

Habang pinaghahandaan ninyo ang mga hamon at oportunidad na darating, hinihikayat ko kayong makipag-ugnayan, matuto mula sa isa’t isa, at sama-samang umangat bilang mga kaagapay sa pagtatayo ng Bagong Pilipinas, kung saan kinikilala at nililinang ang kakayahan ng indibidwal, at dinirinig ang boses ng bawat isa.

Sa muli binabati ko kayong lahat!  Umaasa kami na babaunin ninyo ang mensahe ng pagkakaisa at pagtulungan, tungo sa pagbabagong inaasam sa kasalukuyan at sa susunod pang mga heherasyon.

Maraming salamat, at nawa ang inyong paglalakbay ay mapuno ng tagumpay, kasiyahan, at makabuluhang ambag sa ating bansa!